shAradAtrishatI : 86-100

[Guest guest]

kamalAsanapuNyakalA namatA.n chintAmaNirvANI .

jIvAkSharabodhakalArUpA jayatIha sattvarUpavatI .. 86 ..

 

brahmANDamaNDalamida.n vyApta.n mAtrA kSharAkSharAdijuShA .

yatpadakamala.n nitya.n shrutitatisudatIvibhUShaNa.n cha viduH .. 87 ..

 

manasijasAmrAjyakalAlakShmIreShA viri~nchimukhaharSham .

vyAtanvAnA nitya.n rAjati ShaDarasvarUpachakratale .. 88 ..

 

ma~njulavINAninadaprayoganirdhUtamohasa.nchArA .

ha.nsIyAnA vANI ha.nsagatiH sukR^itinetrapuNyakalA .. 89 ..

 

kuchakalashasavidhavinihitavINAnikkANasAvadhAnakalA .

adhinetrI hi kalAnA.n sakalAnA.n shAradA jayati .. 90 ..

 

tridashapariShanniShevyA prAtaH sAya.n praphullamukhakamalA .

kamalAsnuShA hi vANI vANI.n dishatu prabandharasabharitAm .. 91 ..

 

adhikachapalaiH kaTAkShaira~nchitalIlArasairudArairnaH .

maN^galamAtanvAnA vidhAtR^igR^ihiNI surAdinutapAdA .. 92 ..

 

kAnta.n lakShmIbhavana.n mukhakamala.n shAradAdevyAH .

saubhAgyakAntisAra.n spR^ihayati me mAnasa.n sarasam .. 93 ..

 

kAruNyapUrNanayana.n pustakahasta.n mahaH kimapi .

dhAtuH puNyakalAnA.n paripAko martyarakShaNa.n kurute .. 94 ..

 

sa.nsAravArirAshi.n tartu.n sA setureShA naH .

dhAturgR^ihiNI duHkha.n shithilayatu para.n janiprAptam .. 95 ..

 

sarasakavikalpavallImambA.n vANImahamupAse .

antastamonihantrI.n yAmAhurj~nAnadA.n munayaH .. 96 ..

 

mama lochanayorbhUyAt vidyA kApi pradhUtajanibhItiH .

nigameShu sa.ncharantI kR^ipAnidhiH shAradA devI .. 97 ..

 

shamitanataduritasa.nghA dhAtre nijanetrakalpitAnaN^gA .

kR^itasurashAtravabhaN^gA sA devI maN^galaistuN^gA .. 98 ..

 

padmAsanasthitA.n tA.n vANI.n chaturAnanA.n vande .

kalyANAnA.n saraNi.n kavipariShatkalpavallarI.n mAnyAm .. 99 ..

 

kuchabhArasa.nnatAN^gI.n kundasmerAnanAmbhojAm .

kundalakusumaparimalasa.npAditabhR^iN^gajha.nkR^ititaraN^gAm .. 100 ..